مقالة من اروع ما قرات - موسم الامتحانات لبهاء جاهين

مجلة الشباب العدد 335 يونيو 2005
كتب بهاء جاهين :
بعنوان ( موسم الامتحانات)

كتبت وانا صغير اغنية ساذجة اسمها (موسم الامتحانات) اولها بيقول ابريل ومايو ويونيو موسم الامتحانات ... ليه بتحلوى يا دنيا فى الوقت ده بالذات؟
ودا على اعتبار ان الربيع يتزامن مع شهور المذاكرة والامتحانات . ماكنتش اعرف وقتها ان الامتحانات مالهاش موسم وان الحياة موسم امتحانات متجدد مابينتهيش الا لما نسلم ورقة الاجابة الكبرى على اسئلة حياتنا كلها
وعلى هذا الاساس اسمحوا اكتب هنا وفى الحال اغنية جديدة بنفس الاسم اولها بيقول :
عندى يا ناس مشكلة
فات نص وقت الاجابة
وورقة الاسئلة
بينى وبينها ضبابة
مش عارف اقرا الحروف
شاورولى طب ع السؤال
انا بالذكاء معروف
ولكل شئ حلال
رد اللى قال خد وقتك
قدام جنابك سنين
مانتاش مسلم اجابتك
غير لما ساعتك تحين
طيب هاتولى مدرس
استاذ فى علم المعانى
يعرف يفسر كويس
خط اللى خط امتحانى

**********

(مانيش طويل القامة ولا عظيم الهامة لكن عيونى بصيرة ونظرتى فهامة)
قال الكلام ده شخص حسيت به فجاة ورا كتفى وانا محنى ع الورقة باحاول افك رموزها
قرا الاسئلة مبتدئا بالسؤال الاول :
(جوهرة تزن الجبال ولا وزن لها)
فكرت كتير ولما ماعرفتش الحل قال :
بص تحت رجليك , بصيت مالقيتش حاجة
قال : بص وراك , بصيت شخط فيا المراقب : بص قدامك
قدامى لقيت حيطة عليها سبورة , بصيت فوقى لقيت السقف
يمين شمال عيال مكفية زيى على ورق مش عارفين يقروه
غلب حمارى
وابتسم اللى واقف جنبى وقال :
- بص جوالك
- طب كان ليه الدوخة
- عشان تتاكد بنفسك ان مفيش حاجة حواليك
- ازاى بقى ؟
- اقصد الاجابة مش حواليك ... جواك
- جوايا فشة وكبدة ومعدة وطحال .. وقلب
- عظيم ابتديت تفهم
- افهم ايه مش فاهم
- بص جوة قلبك من فضلك
- وح اجيبه من جوة ازاى؟
- بص جواه بعينيه هو
- هو مين؟
- قلبك يا ممتحن
- انت جى تساعدنى ولا تلخبطنى؟
- انت اللى مش عايز تفكر
- افكر فى ايه؟
- ايه اغلى حاجة فى الدنيا؟
- الالماظ؟
- مش جواهر مادية
- (ساخرا) امال جواهر جوهرية؟
- بالظيط
- عجيبة ده انا كنت بهزر
- بس انا مابهزرش ولا الحياة بتهزر .. ايه اثمن جوهرة جوهرية توزن الجبال وكفتها تطب مع ان مالهاش وزن؟
- (يفكر) الحب؟
- اجابة السؤال الاول

**********

- طيب خش ع السؤال الثانى مفيش وقت
- فعلا مفيش وقت ... مع ان قدامك الحياة كلها
السؤال الثانى :
(الحق والخير والجمال ثلاثة ام واحد)؟
- طبعا ثلاثة .. سؤال سهل جدا .. وعبيط كمان
- متاكد؟
- الا متاكد .. الحق .. ادى واحد .. الخير .. ادى اتنين .. الجمال ثلاثة . ده سؤال اطفال الحضانة يحلوه
- ممكن بس ح يحلوه غلط .. زيك بالظبط
- (ساخرا) طب نورنى يابو الانوار
- الحق .. جميل ولا مش جميل؟
- جميل
- وقول .. الحق خير ولا مش خير؟
- خير
- واللى يعمل خير .. مش يبقى على حق؟
- اكيد
- والجمال اللى خلقه ربنا .. السما والبحر والورد والانسان .. خير ولا شر؟
- كل خير
- واللى يحب الجمال .. على حق ولا لا؟
- لا طبعا مش لا
- والحق والخير والجمال .. مش من صفات الله؟
- ايوة
- وربنا .. مش واحد؟
- لا شريك له
- يبقى الحق والخير والجمال
على ضوء ما سبق ثلاثة ام واحد؟
- واحد
- ودى اجابة السؤال الثانى

**********

لايمنى ع الثالث بسرعة .. انا سخنت
(الاجابة الواحدة الوحيدةعلى كل الاسئلة مهما اختلفت وتعددت هى ...)
- سؤالص عب ومش معقول كمان
- فكر
- لو فكرت من هنا لحد ما يسحبوا منى الورقة (بعد عمر طويل) برضه مش ح اعرف الاجابة
- طيب تعالى نفكر سوا
- عايز تفهمنى انك عارف الحل؟
- ايوة عشان فهمت السؤال
- طيب فهمنى ينوبك فيا ثواب
- ايه اصل الشر؟
- ده مش شرح ده سؤال
- جاوب من فضلك
- اصل الشر؟ الاشرار؟
- معقول . وليه فى اشرار؟
- والله ده حال الدنيا .. حكمة ربنا
- عظيم .. والدنيا جميلة؟
- جميلة
- وفيها فقر وذل وخوف وظلم ومرض؟
- فيها
- تبقى مش جميلة
- صح
- لكن فيها برضه حب وخير وجمال وعلم وفن
- فيها
- تبقى جميلة
- صحيح
- يعنى جميلة ومش جميلة
- صحيح
- وحتى لو كانت مش جميلة برضه بنحبها
- ايوة
- ازاى؟
- (يفكر) زى ما قلت قبل كدة .. حكمة ربنا
- رائع . مش فاضل غير انك تدينا الاجابة
- (يتردد) حكمة ربنا؟
- جاوب ما تسالش
- (عن اقتناع) ربنا
- ودى اجابة السؤال الثالث والاخير
- يعنى انا نجحت؟
- دا مجرد امتحان نظرى .. لسة التطبيق العملى .. ودا اللى عليه معظم الدرجات


----------


ملحوظة .. انا ناقل المقالة من المجلة بنفسى مش واخدها كوبى بيست 

Posted by عمرو فكرى on 7/09/2011 04:52:00 PM. Filed under المكتبة, كل البوستات . You can follow any responses to this entry through the RSS 2.0.
اوعى ماتسيبش رد